MICHEZO NA BURUDANI

Uwanja wa michezo wa ndani ( Indoor) wanukia Pemba

 Mratibu wa Kamisheni ya Utamaduni na Michezo Pemba, Juma Ali David, (kulia) akiwapa maelezo wajumbe kutoka Ubalozi wa Japan Nchini Tanzania, juu ya eneo litakalojengwa uwanja wa Michezo ya ndani, huko Gombani Chake Chake Pemba jana, wapili kulia ni Rais wa chama cha Judo Zanzibar,Tsuyoshi Shimahoka (Abdulhalim),akifuatiwa na Afisa Miradi kutoa ubalozi wa Japan Sayaka Morita,

MSHAMBULIAJI Ali Ahmed Shiboli, aliyepata umaarufu katika mashindano ya Chalenji mwanzoni mwa mwaka huu jijini Dar es Salaam akiwa na timu ya Zanzibar Heroes, sasa amesajiliwa na Jamhuri ya Pemba.

Shiboli pia aliwahi kuichezea Simba ya Dar es Salaam, Kagera Sugar na Coastal Union ya Tanga.

Jamhuri imeweza kuzipiku klabu za Duma na Chipukizi ambazo pia zilikuwa zikiwania saini ya mwanandinga huyo.

Shiboli amemuhakikishia mwandishi wa habari hizi kuwa, tayari ameshamalizana na Jamhuri na kuahidi kujitahidi ili pamoja na wachezaji wenzake waweze kuiletea mafanikio.

“Ingawa nimepitia klabu tafauti Bara na hapa visiwani, lakini nilikuwa na ndoto za siku nyingi kuichezea Jamhuri ambayo ni timu yenye historia kubwa Afrika Mashariki, nashukuru sasa zimetimia”, alisema Shiboli.

Aidha, alisema kuwa katika klabu hiyo yenye maskani yake Wete Mkoa wa Kaskazini Pemba, ameshafika na kuwaomba viongozi, wanachama na wapenzi wa timu hiyo wampe ushirikiano ili aweze kuisaidia katika mashindano ya kitaifa na kimataifa.

Uongozi wa klabu hiyo itayoshiriki ligi ya mabingwa Afrika mwakani ikianza na St George ya Ethiopia, umesema kusajiliwa kwa Shiboli kutazidi kukiimarisha kikosi hicho na kwamba ataongeza nguvu katika jitihada za kutwaa ubingwa wa Zanzibar na kufanya vyema kwenye michuano ya CAF.

Katika hatua za kujiimarisha ili kurejesha hadhi yake, hivi karibuni, Jamhuri iliajiri kocha mpya Sebastian Mkomo, ambaye jana alitarajiwa kuanza kibarua chake kwa pambano la kirafiki kati ya timu hiyo na maafande wa Hard Rock

Na Masanja Mabula, Pemba