KHUTBA YA DR. KIKWETE DODOMA

 

CHAMA Cha Mapinduzi (CCM) jana kilikamilisha safu yake ya uongozi kwa kuwapitisha kwa kishindo viongozi wa ngazi za juu wa Chama hicho katika uchaguzi ambao ulionekana kuwa na nidhamu kutokana na kutokuwa na uharibifu wa kura.

Katika uchaguzi wa safu za juu za Chama hicho, Mwenyekiti, Makamu wa Mwenyekiti Zanzibar na Bara wajumbe wa mkutano huo walitekeleza ombi la Yusuph Makamba la kumchagua kwa kishindo Jakaya Kikwete kuongoza CCM .

Akitangaza matokeo hayo Spika wa Bunge la Tanzania ambaye ndiye alikuwa msimamizi,Anne Makinda alisema kwamba Mwenyekiti alipata ushindi wa kura 2,395 sawa na asilimia 99.92 huku kura mbili zikisema hapana.

Makamu Mwenyekiti Zanzibar Dk Ali Shein alipata kura 2,397 wakati makamu wa Bara Phillip Mangula naye alipata idadi hizo za kura huku kukiwa hakuna kura zilizoharibika wala kusema hapana kwa viongozi hao wawili.

Awali kabla ya kutamka ushindi wa viongozi wa juu, walitamkwa wajumbe 20 wa viti vya Bara na Zanzibar. Leo halmashauri kuu ya CCM (NEC) itachagua Kamati Kuu ;na Mwenyekiti Jakaya Kikwete ataunda sekretarieti. Kitu kikubwa kinachosubiriwa kwa hamu ni nafasi ya Katibu Mkuu.

Akimnadi Kikwete Katibu Mkuu wa zamani wa CCM, Yusuf Makamba, aliwaponda wanaCCM wanaojitangaza kutaka urais mwaka 2015, akisema wanapaswa kujihadhari, vinginevyo watapigiwa kura na wake zao pekee.

Mbali na hilo, aliwaponda waliokuwa na mpango wa kumkwamisha Kikwete ili asiteuliwe tena kuwania uenyekiti wa chama hicho.

Alisema kuna watu wanajitangaza kugombea urais kupitia CCM mwaka 2015, lakini akaonya kuwa uongozi unatoka kwa Mungu na kwamba mtu hujulikana kwa sifa kuu tatu; anavyojifahamu, wenzake wanavyomfahamu na anavyofahamika na Mungu.

“Kuna watu wanasema nagombea urais, wanatangaza nitagombea urais mwaka 2015 … hayo tuachie sisi, unaweza kujikuta unapata kura yako na ya mkeo tu,” alisema Makamba huku akishangiliwa na wajumbe.

Alisema sifa moja ya kiongozi mzuri ni kuwa karibu na watu na hiyo ni sifa ya Rais Kikwete na ndiyo maana amekuwa kiongozi bora.

Kuhusu hoja ya kumpunguzia Kikwete kazi kwa kumwondoa katika uenyekiti, Makamba alihoji wanaotaka apunguziwe kazi, wanataka apewe nani wakati wao kazi moja tu imewashinda.

“Eti wanasema ana kazi nyingi apunguziwe kazi moja, nani kasema kazi zimemshinda? Halafu huyo anayesema ana kazi moja na yenyewe inamshinda, halafu hawasemi … tumpeni nani?” Alihoji Makamba na kuendelea:

“Kazi ipi iliyomshinda? Halafu wanasema tupige kura za maruhani, awe nani?” Alisema Kikwete ni kiongozi mzuri na amekuwa karibu na watu kuliko hata wasaidizi wake na kuongeza kuwa “baadhi walipata adhabu hapa jana (Jumapili) kwa kuwa mbali na watu,” akimaanisha walioshindwa ujumbe wa NEC.

Aliongeza kuwa baadhi ya wanaoomba uongozi wanafanya hivyo kwa manufaa yao, badala ya chama. Alimmwagia sifa Kikwete kwa utendaji mzuri katika chama na Serikali na kuongeza kuwa anastahili kuendelea kuongoza chama hicho tawala huku akiwataka wajumbe wampime Kikwete kwa kazi alizofanya, badala ya kumhukumu kwa matendo ya kibinadamu.

Awali, Makamu Mwenyekiti mstaafu Bara, Pius Msekwa alisema tangu enzi za TANU na ASP na pia kuasisiwa kwa CCM, utamaduni umekuwa ni kwa Rais wa Tanzania kuwa pia mwenyekiti wa chama hicho Taifa.