Manispaa ya Mogadishu yanunua magari mapya ya kuzima moto

Manispaa ya Mogadishu inapanga kufungua kituo chake cha kwanza kinachoendeshwa na serikali tangu mwaka 1991 baada ya kununua magari matatu ya kuzimia moto, Meya wa Mogadishu Mohamed Ahmed Nur alitangaza wiki iliyopita.

• Misheni ya Umoja wa Afrika nchini Somalia unawapa mafunzo watu 15 mbinu za kupambana na moto kwa kutumia gari la kwanza jipya kununuliwa na serikali ya Somalia. [Na Ali Adam/Sabahi]
  

Makala zinazohusiana

• Wakaazi wa Mogadishu washerehekea usalama na maendeleo mwaka mmoja baada ya al-Shabaab
• Kukamatwa kwa Jowhar kwa wazuia zaidi al-Shabaab
• Al-Shabaab kuwaua wanachama wake kunaashiria matatizo makubwa
• Al-Shabaab wapoteza ngome zao za mwisho huko Mogadishu

Magari hayo ya kuzimia moto yalinunuliwa kwa msaada wa fedha kutoka jamii ya Wasomali nchini Uingereza, Nur alisema, ingawa hakuainisha kiwango cha fedha.
Gari moja limeshafika Mogadishu na mawili mengine yako njiani, alisema, na kuongeza kuwa Misheni ya Umoja wa Afrika nchini Somalia (AMISOM) inawapa mafunzo watu 15 wenye umri baina ya miaka 25 na 40 juu ya mbinu za kupambana na moto.
"Tunawatarajia kufanya mabadiliko makubwa katika ukosefu wa vitendea kazi vya kupambana na moto mjini Mogadishu baada ya kupata mafunzo kamili," Nur alisema katika mkutano wa habari hapo tarehe 8 Januari. "Tutaanzisha nambari za simu kwa umma kuweza kupiga wakati wanapohitaji huduma za kupambana na moto."
Kwa zaidi ya miongo miwili, bila ya kuwa na kituo rasmi cha kuzima moto, huduma zilizokuwa zinazomilikiwa na watu binafsi mjini Mogadishu zimekuwa zikitoa ulinzi kiasi fulani, lakini zimekuwa pungufu sana kwa kutoshughulikia ipasavyo mahitaji ya mji mkuu ya kupambana na moto.
Mustafa Abdirahman, mwenye umri wa miaka 34 na mfanyabiashara wa nguo, alisema kuwa ana furaha kubwa kwa kununuliwa kwa magari ya kuzimia moto katika mkoa wa Benadir. Abdirahman alipoteza kiasi cha dola 10,000 za bidhaa wakati duka lake lilipoharibiwa na moto mwaka jana.
"Nilikuwa na duka kubwa la nguo katika soko la Bakara ambalo liliharibiwa kabisa wakati moto mkali ulipoanza ndani ya duka langu. Nilipoteza kila kitu, kwa vile hakukuwa na yeyote aliyejaribu kuuzima kwa sabau ulianza usiku na hakukua na huduma za kuzima moto," aliiambia Sabahi.
Mkazi wa Mogadishu Fadumo Nur, mwenye umri wa miaka 42, pia alikuwa muathirika wa moto wakati moto wa umeme ulipoanza katika duka lake la vifaa vya elektroniki katika soko la Hamar Weyne mwanzoni mwa mwaka 2012. Nur alisema alibahatika kwa sababu vikosi vya AMISOM vilimsaidia kuuzima moto huo na vilifanikiwa kuudhibiti.
"Nilipoteza kiasi cha dola 15,000 katika moto huo," aliiambia Sabahi. "Wamiliki wenzangu wa biashara mjini Mogadishu wanalo tatizo hilo hilo. Sisi kama wamiliki wa biashara, tunalishukuru baraza la manispaa na tawala za mikoa kwa juhudi zao za kuleta magari mapya ya kuzimia moto Mogadishu."
Mohamed Warsame, mwenye umri wa miaka 56, ambaye alikuwa akifanyakazi katika Manispaa ya Mogadishu miaka ya 1980, alisema kwa Mogadishu kupata magari ya kuzima moto kunaonesha maendeleo na kujijenga upya baada ya uharibifu wa miongo miwili iliyopita. Alisema kuwa hii ni hatua ya mwanzo tu, kwa vile Mogadishu inahitaji zaidi ya magari matatu, kwa mji wenye watu wanaokadiriwa milioni 3.
"Kwa muda wa miaka 21, watu wengi wa Somalia walipoteza mali zao wakati biashara zao ziliposhika moto kwa sababu mji haukuwa huduma zinazofaa za kupambana na moto," Warsame aliiambia Sabahi.
"Mogadishu ilikuwa na kitengo cha kupambana na moto ambacho kilikuwa katika mkao wa tahadhari usiku na mchana kila siku na kilihudumia sehemu yoyote ya jiji," alisema. "Natumai kuwa huduma hiii itarejea kama ilivyokuwa au kuwa bora zaidi."