Kurejea kwa watu kutoka ughaibuni kwachochea migogoro ya ardhi mjini Mogadishu

Mogadishu inashuhudia wimbi la mizozo ya umiliki wa ardhi kutokana na kurejea kwa maelfu ya Wasomali kutoka ughaibuni.

• Familia za Wasomali waliokimbia makazi yao wakisimama miongoni mwa vibanda vya muda katika kambi moja mjini Mogadishu mwaka 2011. Serikali imekuwa ikifanyakazi kuzitafutia makazi familia zinazoishi katika majengo ya umma. [Na Tony Karumba/AFP]
  

Makala zinazohusiana

• Vikosi vya Umoja wa Afrika vikikaribia ngome kubwa kabisa ya al-Shabaab karibu ya Mogadishu
• Wakaazi wahamishwa katika makazi yaliyo kinyume na sharia huko Mogadishu
• Hali ya maisha ya Mogadishu imekuwa bora zaidi baada ya al-Shabaab kuondolewa
• Vikosi vya washirika vyawatimua al-Shabaab kutoka Hudur

Halimu wa Mahakama ya Wilaya katika eneo la Banadir Hashi Elmi Nur alisema kuwa mahakama yake karibuni ilisajili kesi za migogoro ya ardhi kwa kiwango kisichowahi kutokea. Alisema kuwa mahakama zinajaribu kutatua kesi kama hizo haraka inavyowezekana kwa sababu migogoro hiyo inaweza kuelekea kuwa mapigano.
"Kazi yetu inakatishwa na migogoro mingi miongoni mwa warithi wanao kataa maelewano au kuja [katika Manispaa ya Mogadishu] kutatua migogoro ya umiliki wa mali kwa sababu wamerithi ardhi hizo kutoka kwa familia zao kulingana na mikataba ya kimila," Nur aliiambia Sabahi.
Alisema kuwa migogoro ya umiliki wa mali inakua kila siku kwa sababu ilikuwa inashughulikiwa isivyo halali kwa miongo miwili iliyopita.
Nur pia alisema kuwa baadhi ya watu katika soko la Abdalla Shideye mjini Mogadishu wanajinufaisha kutokana na nyaraka za kughushi za umiliki wa ardhi, na kuongeza kuwa polisi watawakamata watu wanaohusika na tabia hiyo na kuwafikisha mahakamani.
Watu mashuhuri wamenunua au kuchukuwa maelfu ya mita za mraba ya ardhi kwa bei chee, jambo ambalo limesababisha migongano mikubwa ya kikabila na kifamilia, alisema. "Sasa tunajaribu kurejesha nyumba na mashamba ambayo yameuzwa au kuchukuliwa kwa nguvu kinyume cha sheria," alisema.
Meya wa Mogadishu Mohamed Ahmed Nur alionya dhidi ya ujenzi haramu wa majengo na hoteli za kitalii katika maeneo karibu na ufukwe ambao wote unamilikiwa na serikali ya Somalia.
"Kila mtu imuingie akilini kuwa ardhi yote iliyoko pwani kutoka kaskazini hadi kusini ya nchi inamlikiwa na serikali ya shirikisho na tunaweza kuona kwa macho yetu wenyewe vipi watu wanajaribu kuchukua fursa ya hali tete ya utawala," alisema. "Wanajipa kiwango kikubwa cha fedha kwa kuuza [zilizokuwa] makao makuu ya jeshi, kambi za kijeshi, viwanja vya ndege vya kijeshi, hospitali na balozi. Tunapenda kutangaza kuwa haya ni matendo haramu yanayofanywa na watu wasiokuwa wazalendo."
Kwa kuongezea, meya aliwataka wakaazi wa Mogadishu kuondoka katika majengo ya watu binafsi ambayo wanayakalia visivyo halali na ardhi nyengine za familia zilizokimbia vita vya wenyewe kwa wenyewe miongo miwili iliyopita. Pia aliwataka watu waliokimbia makazi yao kuondoka katika wizara, mashirika, hospitali na maeneo mengine yanayomilikiwa na serikali jijini.
Nur alisema kuwa utawala wake utatuma ujumbe kwa mkuu wa kikosi cha polisi kuwatia mbaroni wale wanaojaribu kudai ardhi inayomilikiwa na Wizara ya Kazi za Umma na kuibadilisha kuwa mali binafsi au ya uwekezaji.
Wakili Filsan Yusuf Siad alisema kuwa kukosekana kwa sheria na kanuni kumesababisha utamaduni wa kupora na kuchukua ardhi za umma na za binafsi.
Aliiambia Sabahi kuwa vikosi vya usalama vinapaswa kupambana na watu mafisadi na watu maarufu wa makabila ambao wanajipa na kuuza ardhi isivyokuwa halali.
"Nadhani kuwa ili kulitatua suala hili litakuwa gumu hadi pale polisi itakaposimama pamoja na mahakama. Ikiwa sio hivyo, basi tutakuwa mapinduzi ya umwagaji damu miongoni mwa wanaigombania," alisema.
Naye Mbunge Mohamed Mohamud Heyd alisema kuwa ardhi ya serikali haipaswi kugeuzwa kuwa hoteli za kifahari au kutumiwa kwa madhumuni mengine ya biashara.
"Nitalipeleka suala hili katika kikao cha bunge ili kufikia uamuzi ambao utakomesha shughuli gharamu," Heyd aliiambia Sabahi. "Tunapaswa tusiwe na huruma kwa suala haramu kama hilo ambalo linawafungulia milango wazi wadanganyifu."