Mashirika ya haki za binadamu yataka kuachiwa kwa haraka kwa mwandishi wa habari wa Somalia

Serikali ya Somalia inatakiwa kumuachilia huru mara moja mwandishi wa habari Abdulasis Abdinuur Ibrahim na watu wengine watatu wanaoshikiliwa kuhusiana na mwanamke anayedai kubakwa na wanajeshi wa Somalia, mashirika ya kutetea haki za binadamu ya Amnesty International, Kamati ya Kuwalinda Waandishi wa Habari and Human Rights Watch yalisema katika taarifa hapo Jumatano (tarehe 23 Januari).

Makala zinazohusiana

• Umoja wa waandishi wa habari wapinga kukamatwa kwa mwandishi baada ya mahojiano ya ubakaji
• Rais wa Somalia aahidi kuchukua hatua kali za kinidhamu kwa ghasia zinazolenga waandishi wa habari
• Mashirika ya waandishi wa habari yatoa wito kwa Somalia kumwachia mwandishi aliyeko jela
• Polisi Somalia wasema anayedaiwa kuwa muhanga wa ubakaji alisema uongo

"Serikali mpya ya Somalia inazungumza kwa usahihi kabisa kuhusu utawala wa sheria na uhuru wa vyombo vya habari, lakini kuwafungia waandishi wa habari na watu wengine wanaotoa taarifa kuhusu visa vya ubakaji unatoa ujumbe tofauti na yale inayoyasema," alisema Mkurugenzi wa Human Rights Watch barani Afrika Daniel Bekele. "Mamlaka ni lazima iwaachilie huru watu hao wanne inaowashikilia na kuhakikisha kuwa polisi wanachunguza ukatili wa kijinsia kwa ufanisi."
Mtu anayedaiwa kubakwa Lul Ali Hassan, Ibrahim pamoja na watu wengine waliowezesha kukutana kwa Hassan na mwandishi Ibrahim wako mikononi mwa polisi kwa muda wa wiki nzima sasa bila kufunguliwa mashtaka.
Katika kujibu tuhuma hizo serikali ya Somalia imerejelea ahadi yake ya kuwalinda waandishi wa habari na kuhakikisha kunakuwepo na uhuru wa kujieleza, huku ikitetea kitendo cha kumshikilia Ibrahim kwa ajili ya kuchunguza kisa hicho cha ubakaji dhidi ya Hassan.
Polisi ya Somalia imesema kuwa Ibrahim na makundi ya haki za wanawake walimlipa Hassan ili atoe tuhuma za uongo dhidi ya vyombo vya usalama.
"Matokeo ya uchunguzi wa daktari yamethibitisha kuwa Lul hajabakwa kama anavyosema mwenyewe na amethibitisha kwa hiyari yake kuwa tuhuma hizo ni za uongo," alisema Waziri wa Mambo ya Ndani na Usalama wa Taifa, Abdikarim Hussein Guled.
Umoja wa Waandishi wa Habari wa Somalia (NUSOJ) umeelezea wasiwasi wake juu ya namna kesi hiyo inavyoendeshwa, hasa baada ya shauri lililopangwa kusikilizwa Jumanne kuahirishwa kwa ombi la Mwanasheria Mkuu wa Serikali Abdulkadir Mohamed Ali Muse.
"Kwa niaba ya waandishi wa habari wa Somalia, natoa wito kwa serikali ya Somalia kumwachilia huru mwandishi wa habari na kuunda tume huru ya kuchunguza kwa umakini tuhuma hizo na kupata ukweli wa kesi hiyo," alisema Katibu Mkuu wa NUSOJ, Mohamed Ibrahim, kwa mujibu wa kituo cha redio cha RBC cha Somalia.