Mogadishu yaangalia hatima, yakarabati viwanja vya michezo

Majengo ya michezo mjini Mogadishu kwa sasa yanafanyiwa ukarabati kufuatia miaka mingi ya kutotumiwa na kutotengenezwa.

• Uwanja mpya wa mpira wa kikapu uliokarabatiwa katika Wialya ya Abdulaziz District mjini Mogadishu. [Na Ali Adam/Sabahi]
  

Makala zinazohusiana

• Michezo kurejea katika viwanja vya michezo vya Mogadishu kadri usalama unavyoimarika.
• Ligi kuu ya Somalia yakamilisha msimu bila ya kukumbwa na vurugu
• Michezo yarejea katika miji iliyokombolewa kutoka kwa al-Shabaab
• Wanariadha wa Kisomali wajitayarisha kwa Olimpiki London 2012

Shirikisho la Mpira wa Miguu Somalia (SFF), kwa ufadhili kutoka Shirika la Kimataifa la Mpira wa Miguu (FIFA), limeanza ukarabati wa Uwanja wa Konis katika Wilaya ya Abdulaziz mjini Mogadishu.
Uwanja wa Konis ni moja miongoni mwa majengo makubwa ya michezo mjini Mogadishu ambayo yaliharibiwa vibaya sana miaka 20 iliyopita. Katika miaka iliyopita, uwanja huu ulikuwa alama ya matumaini na kurejea kwa hali ya kawaida jijini kukifanyika shughuli kama vile mwaka mmoja tangu kuondoka kwa al-Shabaab kutoka kwa jiji hapo tarehe 6 Agosti na mafunzo ya timu ya kwanza ya Olimpiki ya Somalia kushiriki katika michezo baada ya miaka mingi.
FIFA ilituma mhandisi kutoka Netherlands kuongoza mradi wa ukarabati katika uwanja wa Konis, kwa mujibu wa mwenyekiti wa SSF Abdiqani Said Arab.
Nyasi bandia zilizotolewa na FIFA sasa zinawekwa katika uwanja, aliiambia Sabahi.
Gharama kamili za ukarabati wa Uwanja wa Konis bado hazijajulikana, alisema, kwa sababu ujenzi unaendelea. Alisema kuwa SFF itatoa tangazo za gharama hizo baada ya ukarabati kukamilika mwezi Januari.
"Tunapenda tuvifanyie ukarabati viwanja vyote vya michezo nchini, lakini hatuwezi kutokana na ukosefu wa fedha," Arab alisema. "Hivi karibuni tulikarabati kiwanja cha mpira wa kikapu wa Ex-Lujino katika Wilaya ya Abdulaziz. Gharama za ukarabati zilikuwa zaidi ya dola 10,000, ambazo zilitolewa na Kampuni ya Mawasiliano ya Simu ya Hormuud ."
Arab alisema kuwa wanatafuta michango kutoka makampuni na mashirika kusaidia kukusanya fedha na kukarabati majengo mengine ya michezo jijini.
Haji Aweys Sheikh Adow, naibu mwenyekiti wa Chama cha Mpira wa Miguu Wilaya ya Wadajir na mchezaji mpira aliyestaafu, alisema kuwa amefurahishwa na kufufuka kwa michezo nchini Somalia na kukarabatiwa kwa viwanja vya Benadir, na kuongeza kuwa chama chake kinajishughulisha na juhudi kama hizo.
"Tunalipongeza Shirikisho la Mpira wa Miguu la Somalia kwa kuchukua hatua za kurejesha utukufu wa zamani wa viwanja vyetu," Adow aliiambia Sabahi.
Alisema kuwa miradi ya ukarabati ni hatua kubwa mbele, hatimaye kuwezesha michezo ya Somalia kupata upya utukufu wake wa zamani na kuiimarisha katika miaka ijayo.
Dadir Amin, mchezaji wa Timu ya taifa ya Somalia na timu ya Benadir Telecom, alisema, "Nina furaha kupita kiasi kwa sababu sikufikiria daima kwamba ningecheza katika kiwanja chenye nyasi bandia wakati nikiwa nchini kwangu. Kama ujuavyo, uwanja wetu wa Konis sasa una nyasi zinazofaa kwa ajili ya kuchezea na mipango sasa ni kuufungua haraka ili tuweze kucheza kule katika msimu ujao wa ligi."
Amin alisema kuwa mpaka sasa wachezaji wa Somalia wanaoshindana nje wamepoteza michezo kwa sababu walikuwa hawakuzowea kucheza katika viwanja vyenye nyasi bandia. Mara tu Uwanja utakapokamilika kwa ajili ya shughuli, alisema ana matumaini kuwa hilo litabadilika, na kuwapa wanariadha wa ndani mazingira sawa na yale watakayokabiliana nayo katika mashindano ya kimataifa