Mwandishi wa habari wa shirika la Shabelle Media Network auwawa mjini Mogadishu

Watu wenye silaha ambao hawakutambuliwa walimuua mtangazaji wa radio wa shirika la Shabelle Media Network (SMN) mjini Mogadishu hapo Ijumaa (tarehe 18 Januari), liliripoti shirika la habari la AFP.

Makala zinazohusiana

• Muda wa Matukio: Waandishi wa habari wa Somalia waliouawa mwaka wa 2012
• Wasiwasi kuhusu usalama wa waandishi wa habari waongezeka Somalia
• Mauaji ya mkurugenzi wa habari yalaaniwa sana
• Mabomu mawili ya kujitoa mhanga katika mkahawa wa Mogadishu yaua 14

Abdihared Osman Adan alipigwa risasi mara kadhaa alipokuwa akielekea kazini kutoka nyumbani kwake katika wilaya ya Wadajir ya Mogadishu.
"Watu wenye silaha walimpiga risasi mara tatu shingoni na begani. Alijeruhiwa vibaya na alipelekwa hospitali ambako alitangazwa ameshafariki dunia," alisema mfanyakazi mwenzake Mohamed Bashir. "Hatujui dhamira ya wauaji hao, lakini inaonekana kuwa ni sehemu ya kampeni ya kuumaliza uhuru wa habari nchini."
Abdihared Osman Adan ni mwandishi wa habari wa kwanza wa Kisomali kuuawa katika mwaka huu wa 2013. Waandishi 18 wa habari waliuawa nchini Somalia mwaka jana, wakiwemo wanne wanaofanya kazi na shirika la SMN, miongoni mwao akiwa ni mkurugenzi wa stesheni hiyo. Hakuna mtu hata mmoja aliyefikishwa mahakamani kwa mauaji hayo.
Shirika la SMN liliyalaani mashambulizi hayo likisema kwamba Adan alikuwa "mfanyakazi wa kipekee na anayeshughulika kote kwenye televisheni na redio wa mtandao huo."
Balozi wa Uingereza nchini Somalia Matt Baugh kwa haraka aliitaka serikali ya Somallia kuwafikisha wauaji mbele ya sheria. "Ni muhimu kumaliza hii hali ya watu kutokuguswa na mkono wa sheria kwa mauaji ya waandishi wa habari," alisema, kwa mujibu wa taarifa iliyotumwa kwenye mtandao wa Twitter. "Kazi yao ni muhimu sana kwa mustakabali wa Somalia na lazima waweze kufanya kazi bila ya kuhofia maisha yao. Ninawapongeza kwa ushujaa na taaluma yao."