Vikosi vya Somalia vyafanya operesheni karibu na Jowhar

Majeshi ya Somalia yalifanya operesheni katika kijiji cha Bayahow karibu na Jowhar siku ya Alhamisi (tarehe 24 Januari) baada ya kundi la al-Shabaab kulivamia eneo la Jowhar usiku mmoja kabla ya siku hiyo, uliripoti mtandao wa habari wa Garowe nchini Somalia.

Makala zinazohusiana

• Kukombolewa kwa Balad kutoka kwa al-Shabaab kwafungua mlango kuelekea Jowhar
• Wasiwasi kuhusu ustawi wa raia unaongezeka kadri Kismayo inavyokaribia kukamatwa
• Mogadishu yakombolewa kutoka mikononi mwa al-Shabaab: Maafisa wa usalama wa Somalia
• Kuipoteza Afgoye ni pigo kubwa kwa al-Shabaab

Hakuna mapigano yaliyoripotiwa kwenye operesheni hiyo mjini Bayahow, lakini vikosi vya usalama vinaripotiwa kuwatia nguvuni watu kadhaa wanaoshukiwa kuwa wanamgambo.
"Majeshi ya Somalia yamejibu mashambulizi ya al-Shabaab," alisema Jenerali Mohamed Saney, Kamanda wa Jeshi la Somalia katika Kitengo cha Pili. "Tunaamini kuwa mashambulizi hayo yaliandaliwa katika mji wa Bayahow, karibu na Jowhar." Alisema kuwa mwanamgambo mmoja wa al-Shabaab ameuawa katika uvamizi wa Jumatano.
Wakaazi wa mji huo walisema kuwa mapigano hayo yalidumu kwa muda wa saa moja na waliona miili kati ya mitano hadi sita ya wapiganaji waliokufa kutoka na tukio hilo. Jowhar imebakia tulivu huku Vikosi vya Kulinda Amani vya Umoja wa Afrika nchini Somalia vikiendelea kuulinda mji huo.